Di bunguli anak - anak

MEMANG ngalih amunnya jadi urang pelupaan. Sambat haja Pandil (ngaran samaran) nang selalu lupa meski hanya semenit haja wan apa nang diulahnya tadi.
Kebujuran kisahnya bemula ketika inya hanya keluar rumah. Seperti biasa, inya memanaskan dulu motornya gasan berangkat begawi. Beberapa menit imbah itu, inya bejalan.
Sampai di muka gang, Pandil melihati banyak kekanakan tekurihing melihat Pandil nang beparak melintas ke arah mereka.
Pas di hadapan bubuhan kekanakan itu, sepalihan kekanakan ketawaan, kejadian itu meolah Pandil tambah bingung wan tersinggung. "Napa ikam ketawaan semunyaan, ada nang lucukah," jar Pandil wan kekanakan.
Salah seurang kekanakan langsung menyahut pertanyaan Pandil. "Kada papa om, standar motor pian itu nah," jawab salah seurang kekanakan nang meulah sepalihan kekawalannya makin lucut ketawaan.
Mendangar itu, Pandil sedikit tenang. "Makasilah," jar Pandil sambil menyetel batis kirinya gasan menaikkan standar motornya. Tapi bekali-kali diayun, standarnya kada jua tenaik. Imbah dilihati, ternyata sudah bujur. Kejadian itu tambah meulah kekanakan ketawaan. Tapi si Pandil tambah sarik lalu menyasahi kekanakan. "Sini ikam, dasar urang tuha dikerjai," katanya.